සුදු ඉද්ද

530_8ab29c97ab8a98626422c01111eb4425

මතක මංපෙත පුරා සැරි සරා
අනුන් සතු මලෙක තතු
ගෙනෙවද මල්සරා
නිද්‍රාව අහිමි තරු හදවතක දුක දරා
සැඟව යන තරුව වෙමි
හිරු එළිය විඳ දරා

මල් සුවඳ විඳ ගැනුම
පරම හිමි කම නොවෙද?
අයිතයට ගන්න හැකි
පර නොවන මල් වෙත් ද?

ලොවේ දහමට අනුව හැඩ ගැහෙන සුදු ඉද්ද
මලට වුව අයිති වෙන එකදු බඹරෙකු නැද්ද?
පිණි වැටෙන හිමිදිරිය සුව සදන බඹරින්ඳ
හිතට ගනු පරව යන බව වුවද සුදු ඉද්ද?

මලෙක වුව ඉමිහිරිම මෙලෙක හඳුනා ගන්න
හිතක පර නොවෙන බව හොඳින් වටහා ගන්න
විඳින වද වේදනා සඟවගෙන ඉවසන්න
හැකිය මට නුඹ නමින් දන්නවද සුදු ඉද්ද?

-නිරුත්තර.
24 සැප්තැම්බර් 2016.

ගින්දර පළඳනාව

gindaraඇමරිකානු නවකතාකරුවෙකු වන නැතනියෙල් හෝත්‍රෝන් උපත ලද්දේ 1804 වසරේදීය. 1850 වසරේ එළිය දුටු ඔහු විසින් රචිත The Scarlet Letter නම් මෙම නවකතාව ඔහුගේ නවකතාවලියේ අග්‍ර ඵලය වෙයි. එමෙන්ම ලෝක සාහිත්‍ය ඉතිහාසයේ කඩයිමක් සටහන් කල සුවිශේෂී නවකතාවක් ද වන්නේය.

1642 සිට 1649 දක්වා කාල වකවානුව කේන්ද්‍ර කර ගනිමින් හෙස්ටර් ප්‍රීන් නම් කාන්තාවක් වටා ගොතන ලද කතාන්දරයකි. ඇය ඉංග්‍රිසි ජාතිකයෙකු හා විවාහ වී ඇම්ස්ටර්ඩෑම් වල බොහො කලක් ජීවත් වී අනතුරුව ඔවුන් නව එංගලන්තයේ මැසචුසෙට්ස් වල පදිංචි  වෙන්න තීරණය කරයි. ඉංග්‍රීසි ජාතිකයා ඔහුගේ කළ යුතු කටයුතු ඇති බැවින් ඔහුට කලියෙන් බිරිඳ පිටත් කරනු ලබයි. ඇය අවුරුදු දෙකක් බොස්ටන් නුවර ගත කළ පසුවද ස්වාමියාගෙන් කිසිම තොරතුරක් නොලබයි. ඒ අතර තුර ඇතිවන ප්‍රේමයකින් ඇයට දර ගැබක් හට ගනු ලබන අතර ඇය හා දරුවා මුහුණ දෙන සිදූවීම් වටා කතාව ගොඩ නැගේ.

අවනීතිය, පාපය හා හෘද සාක්ෂියේ ප්‍රබලත්වය මෙම නවකතාවේ ප්‍රමුඛ තේමාවයි. ස්ත්‍රියක ප්‍රධාන චරිතය ලෙස ගෙන  එකී තේමාව සාකච්ඡාවට බඳුන් කල ලොව ප්‍රථම නව කතාව ලෙසද විචාරකයන් ගේ පැසසුමට ලක්වෙයි.

පරිවර්තනය :  ස්වර්ණකාන්තී රාජපක්ෂ.